Waxa tiriyey Yuusuf Cismaan Cabdille "Shaacir"
Maasandi Badhax-tira waxay soo baxday 18/01/2010
Qarnigan dhamaaday bilawgiisii ilaa badhtamihiisii waxa isa soo tarayay aqoonta maadiga ah ee debedaha inagaga imanaysay, taasoo aad mooddo inay maanta marayso meelihii ugu sarreysay. Haddaba waxa muuqata in aanay wali la fal gelin waxyaabihii sooyaalka ahaa ee ay bulshadu aaminsanayd sida diinta iyo dhaqanka. Maansadan koobani waxay igaga dhalatay dood-cilmiyeed loo qabtay aqoonyahannada dalka, anigase waxa shirkaa iiga bidhaamay in aanay aqoonyahannadu wali fahmin waddooyinkii loo mari lahaa bulsha weynta.
Farriintaydani waa talo ku waajahan aqoonta maadiga ah in lagu saleeyo diinta iyo hab dhaqanka bulshada si ay isula jaan qaadaan.
Barashada aqoontiyo
dadku waa ka bogashada
Beentuna waxyeeliyo
baaxad soore weeyaan
Ballankana qofkii galay
inuu baajo ma ahayn
Baxnaanada adduunkiyo
Berritiyo wixii maqan
Bixisada heddaadiyo
Bil dhacaysa haw gudin
Baahidana sideedaba
Naftaa lagu bilkeedaye
Waxba bahalo haw cunin
Baaxaadeggiisiyo
Waayahays beddelayaa
Adoo bari ku talo galay
Bogox yaanay kula qaban
Maalin aad u ba’anoo
Boqor lays hortaagiyo
Baxar baa dambeeyee
Camal lagu badbaadiyo
Diintaada badhax tiro
Wakhtiguna bushaariyo
Waa baaqa noloshiyo
Bardaan lagu nageeyoo
Isagaa badhaadhaha
Bulsha weynta geeyoo
Baxsanaanta dhaliyee
Qofku baylah kaga tagay
Baadi doon la raadshiyo
Kuma helo badheedhaha
Burhaan lagu tilmaamiyo
Bayaxawga hodankee
Baashaal cayaariyo
Barje lagu hungoobiyo
Ha ku lumin barbaareey
Waxaan baabna kuu gelin
Barashada aqoontiyo
Cilmi baaxadiisuna
Buuraha dushoodiyo
Badda mawjaddeediyo
Waa hirar bidhaamoo
Nin buraashad dhaansaday
Kama goosan baarkoo
Kama bogan wax sheegiyo
Baahida aqoontee
Intan buugga lagu qoray
Ama bilo laguu dhigay
Ha ka dhigan bardaankii
Buuxinaayay garashada
Boholyawga jamashada
Bixisaa ka dhalatee
PHDda hanadoow
Baryo la isku hawliyo
Billadaha digriiga ah
Inkastaan boogaadshoo
Barbarkooda taagnahay
Misna waxa badhaadhiyo
Barta aynu jecelnahay
Lagu beegsan karayaa
Barakada Quraankiyo
Aayaadka billanee
Boqor lagu xasuustiyo
Buuniga shareecada
Marka loola baydhee
Ballankii ILLAAHAY
Baaqeedu noqotee
Bashar tiisa oo qudha
Bidix aanad u la lumin
Ama aad banjoogtiyo
Baallayda haaddiyo
Bahalaha dugaagiyo
Baxdowgii gamaankiyo
Boosada la maaliyo
Bardihiyo galoolkiyo
Inta geed bukaankiyo
Lagu baanto cudurkee
Bogsiinaaya nabarrada
Baxaaliga dhulkaagiyo
Bulshadaad ka dhalatiyo
Baradaad ku ababtiyo
Markaad baabka diintiyo
Dhaqankaaga baratee
Bilicdii afkaagiyo
Burjigaaga garataa
Barashada aqoontiyo
Baxsanaanta qallinkuna
Bursashada asaagaa
Biid kaaga tallisaa.
Ka eeg halkan maqaalladii - Anonymous
